Mицкоски: Итно распуштање на Парламентот и организирање предвремени избори

Добивај вести на Viber

Лидерот на ВМРО-ДПМНЕ вечерва побара итно распуштање на Парламентот и организирање предвремени избори.

Овој став е реафирмиран на средба со партиите во опозиционата коалиција.

„Претставниците на политичките партии на коалицијата „За подобра Македонија" го осудија чинот на уцени, на закани, на притисоци, на тргување со правото и правдината во врска со уставните промени за остварување на политички цели на кои македонската јавност беше сведок“, изјави вечерва Мицкоски по состанокот на коалицијата.

Тој додаде дека на состанокот e изразена загриженост и за законските измени што се однесуваат на Законот за двојазичност, оној чин каде што на еден полушверцерски начин во доцните вечерни часови беше потпишан указот без потпис на претседателот на државата и истиот следниот ден веќе беше однесен во Службен весник каде што директорот противправно, без потпис на претседателот го објави во „Службен весник“.

„И тука уште еднаш би сакал да потсетам, а од страна на претставниците на политичките партии кои се дел од коалицијата „За подобра Македонија“ изразија поддршка и согласност со тоа што ВМРО-ДПМНЕ претходно го кажа дека е извршен атентат практично на Република Македонија. И изразија поддршка во намерата на ВМРО-ДПМНЕ да се поднесат кривични пријави против сторителите на ова противуставно, противзаконско и противделовничко практично дејствување од страна на парламентарното мнозинство на Зоран Заев и Талат Џафери. Сите изразија и поддршка за поднесување на претставка до Уставниот суд за оценување на уставноста на овој закон“, изјави  Мицкоски.

Вели дека претставниците на коалицијата се согласни со барањето на ВМРО-ДПМНЕ за предвремени парламентарни избори заедно со претседателските избори, за да можат граѓаните на одлучат дали се за понижена и омаловажена Северна Македонија или се за горда и достоинствена Република Македонија.