МИЛАНОВИЌ ИЛИ ПРИМОРАЦ: Вечерва ќе се знае кој ќе биде претседател на Хрватска

Добивај вести на Viber

Зоран Милановиќ убедливо победи во првиот круг од претседателските избори, но не успеа да го добие потребното супермнозинство, па Хрватите повторно излегуваат на гласање.

Во вториот круг од изборите, на 12 јануари, Милановиќ се натпреварува против Драган Приморац, кандидатот на владејачката Хрватска демократска заедница (ХДЗ).

Право на глас имаат повеќе од 3,7 милиони луѓе, а избирачките места се отворени од 7 до 19 часот.

Милановиќ, актуелниот претседател на Хрватска, кој е поддржан од Социјалдемократската партија (СДП) и партнерите, освои 49,09 отсто од гласовите во првиот круг, додека второпласираниот Драган Приморац освои 19,35 отсто.

Милановиќ победи во сите хрватски окрузи и во 20-те најголеми градови, додека кандидатот на ХДЗ победи само во странство, покажуваат резултатите на Државната изборна комисија (ДИК).

Нивниот единствен дуел, одржан на 7 јануари, го одбележа жестока расправија, проследена со размена на остри зборови и навреди.

Милановиќ ги повика гласачите „да го спречат она што мора да се спречи“ и дека „нема да се предадат“, додека Приморац „рече дека ќе ја обединат Хрватска“.

По осми пат од воведувањето на повеќепартиската политика во 1990 година, во Хрватска се одржуваат претседателски избори.

Претседателскиот мандат трае пет години. Неговите овластувања не се обемни, но неговата функција е симболично важна.

Тој ја претставува земјата во странство, е врховен командант на вооружените сили, распишува избори за хрватскиот парламент и референдуми и ја дели извршната власт со владата.

Доколку Зоран Милановиќ победи во вториот круг, тој ќе стане третиот претседател со последователни мандати – претходно тоа им успеа на Фрањо Туѓман, првиот претседател и Стјепан Месиќ.

Хрватска, една од шесте поранешни југословенски републики, стекна независност пред повеќе од три децении. Таа е членка на НАТО од 2009 година, а четири години подоцна се приклучи на Европската унија (ЕУ).

Половина час по затворањето на гласачките места, ДИК ќе ги објави првите резултати од изборите, а до 21 часот би можело да се знае на кого гласачите му дале доверба.