Милошоски: Власта со планот Б ќе дерогира системски закон

Добивај вести на Viber

Антонио Милошоски, пратеникот на ВМРО-ДПМНЕ и учесник во работните групи за законот за јавно обвинителство, во интервју за „Фактор“ вели дека власта со најавениот план Б за СЈО кој го најави министерката за правда Рената Дескоска ќе ја направи Македонија правно несигурна земја и ќе ги урне сите европерспективи.

- Ние очекуваме власта да не си игра политика туку да ги почитува уставните и правните норми кои се темел на владеењето на правото, кое е неопходен пак предуслов за државата да има барем некакви шанси да добие датум за преговори со ЕУ. Затоа, нашиот принцип е заснован на Уставот кој налага дека ниту една власт не може и не смее само врз основа на политичките интереси да дерогира системски закон како што е законот за СЈО или обвинителство кој се носи со 2/3 третинско мнозинство со друг закон за кој е предвидено помало мнозинство како што е Законот за совет на јавни обвинители. Тоа би било лош преседан кој би се повторувал на секое менување на власта што ќе има далекусежни политички последици со копирање на преседанот, но и Македонија ќе биде забележана како држава во која доминира правната несигурност. Затоа не чуди што професорка по уставно право и во моментов министерка за правда, која многу добро знае дека дерогирањето на системските закони не е дозволено го промовира ваквиот став. Тоа дури и да не се случи става темна дамка на владеење на правото, вели Милошоски во интервјуто за „Фактор“.

Во случај 80 пратеници да не гласаат за донесување на Законот за јавно обвинителство, со кој се решава и судбината на СЈО, владата решенијата за СЈО ќе ги решава преку измени на Законот за совет на обвинители кој се носи со 61 глас, најави вчера Дескоска. Таа додаде дека во Законот за советот на обвинители може да се вметнат одредби за избори и организација на новото обвинителство за организиран криминал и висока корупција.

Законот за јавно обвинителство вчера влезе во собраниска процедура и ќе се носи по скратена постапка, а утре е закажана седница на собраниската комисија за европски прашања. Опозицијата ќе може да влијае на неговото менување преку поднесени амандмани.