Можно е ЕЦБ да ја укине банкнотата од 500 евра поради често фалсификување

Добивај вести на Viber

Претседателот на Европската централна банка (ЕЦБ) Марио Драги даде знак дека банкнотата од 500 евра може да биде запрена од промет поради честата злоупотреба на неа од страна на фалсификатори, соопшти Си Ен Ен.

„Се почести се убедувањата во јавното мислење дека банкнотите со големи деноминации се користат за криминални цели. Во рамките на овој контекст ние размислуваме за акција“, рече тој во одговор на новинарско прашање за иднината на најголемата европска банкнота.

Според високи претставници во Европа банкнотата од 500 евра го олеснува перењето пари, бидејќи е полесно да биде пренесувана незабележано. Во минатогодишниот извештај на „Европол“ се наведува дека парите во готово се уште се „преферирана алатка“  на терористите, а банкнотата од 500 евра е најмногу барана.

Според Драги високите претставници на ЕЦБ разговараат што да прават со банкнотата, и секакви активности ќе бидат внимателно имплементирани во пракса.

Неговата изјава доаѓа само неколку дена откако претседателот на еврогрупата Јерун Деиселблум ја повика ЕЦБ да излезе со опции за ограничување на употребата на банкнотата за терористички цели.

Претходно оваа година Европската комисија истакна дека ќе работи со европската банка и „Европол“, за да најде начини за запирање на финансиските текови на терористите. ЕК, исто така, планира да ги регулира виртуелните валути и припејд картички, за да не можат терористите да останат анонимни, кога ги користат овие извори на средства.