МУСЛИМАНИТЕ СЛАВАТ РАМАЗАН БАЈРАМ: Првиот ден - неработен за сите, честитки и желби за мир
Објавено во: Македонија 21 Април, 2023
Верниците од исламска веросиповед денеска го слават празникот Рамазан Бајрам, кој се смета за еден од петте столбови на исламот и празник за духовно и за телесно прочистување. Доаѓа по едномесечниот строг пост, во кој верниците се воздржуваа од храна и пијалоци од зора до зајдисонце. Во сите џамии, денеска се служи утрински Бајрам-намаз. По утринската молитва, верниците ги посетуваат гробиштата на своите роднини.
Рамазан-Бајрам е ден кога се сретнува моќта на богатите со слабоста на сиромашните во љубов, милост и правдина.
По повод празникот, честитка до верниците од исламска вероисповед упати поглаварот на ИВЗ Реисул Улема, Шаќир Фетаи со желби и „молејќи се на Семоќниот Алах да ги прифати со Неговата милост сите наши молитви, нашиот пост, сите наши дела направени во свет месец“.
- Во овие среќни денови Рамазанската школа нè научи да не ги заборавиме нашите луѓе кои имаат потреба: сиромашните, сираците, инвалидите но и нашите исламски институции. Затоа, на крајот на Рамазан, давањето на Садакатул Фитр ни стана обврска, како што Божјиот Пратеник ни покажа дека со давање на Садакатул Фитр го прочистуваме нашиот пост од прекумерни зборови. Со еден збор, Фитр Бајрам е прослава на доброто наспроти злото - вели во честитката Фетаи.
Првиот ден од Рамазан Бајрам е неработен за сите граѓани на Република Северна Македонија.
- Во мое лично име и во име на ВМРО-ДПМНЕ на сите муслимани во Македонија им го честитам големиот празник Рамазан Бајрам.
Живееме во времиња на големи предизвици и проблеми кои ги делиме заедно, исто како што сме ги делеле низ вековите наназад. Токму ваквите празници се можност да ги истакнеме нашите заеднички традиционални вредности кои не врзувале низ годините, а тоа се разбирањето, солидарноста, толеранцијата истрајноста. Верата во Бога го прави секој човек духовно побогат и подготвен да се справи со сите пречки кои се испречуваат пред него. Луѓето, без разлика на религијата, кога се обединети и кога имаат силна верба можат заедно да направат подобро утре за себе и за своите блиски, за своите комшии и за своите сограѓани. Честит Рамазан Бајрам“ , се вели во честитката упатена од претседателот на ВМРО-ДМНЕ, Христијан Мицкоски по повод Рамазан Бајрам.
Претседателот на Владата на Димитар Ковачевски, упати телеграма со честитки до поглаварот на Исламската Верска Заедница, Реис ул Улема хаџи хфз. Шаќир ефенди Фетаи, до членовите на Ријасетот и на Муфтиствата, како и до сите верници од исламска вероисповед, кои празнуваат.
- Упатувам искрени желби за мир, радост и благосостојба до секого и во сечиј дом.
Празниците се денови кога членовите на семејствата, соседите, пријателите се заедно и споделуваат меѓусебна почит, разбирање, солидарност.
Токму на овие вредности, ние заедно го градиме и нашето еднакво општество за сите граѓани, промовирајќи ја мултикултурата како функционална придобивка и со оваа посебност ја интегрираме државата во европското семејство на народи и држави. Честит Рамазан Бајрам - порача Ковачевски.