На ниско ниво е внатрешната ревизија во Македонија

Добивај вести на Viber

Потребата од внатрешни ревизори во Македонија е сеуште на ниско ниво и треба да се работи на подигнување на нивото на внатрешната ревизија како професија, сметаат од Здружението на внатрешни ревизори на Македонија.

- Работиме по различен кодекс на етика, по различни стандарди. Надворешните резивори се сметководствена професија и даваат мислење по финансиските извештаи. Ние го гледаме целокупното работење на компанијата и не може да се каже дека сме сметководствена професија. Не може да се поистоветиме со екстерните ревизори. Се работи за целосно различна професија со различен опфат на работа, истакна Слободан Димитровски на денешната Прва меѓународна конференција на Здружението на внатрешни ревизори на Македонија.

Законите за банки и за осигурителни компании на некој начин се негативни кон внатрешните ревизори затоа што налагаат овие институции да вработуваат екстерно овластени ревизори, смета тој.

Димитровски  нагласува дека бенефитот од внатрешните ревизори е голем затоа што тие се еден вид консултанти, десна рака на раководството на компанијата.

- Сите мислат дека сме некаква инспекција и нашата професија ја замислуваат како некаква контрола која им се наметнува. Ние сме еден вид консултанти. Тоа што раководствното го поставува како систем, наше е да го провериме. Нашите извештаи не одат надвор од компанијата, туку остануваат во неа. Значи ние постоиме за да додадеме вредност на компанијата, а не за да ја затвориме, нагласува Димитровски.

Според евиденцијата на Здружението, во Македонија работат околу 300 ревизори од кои во јавниот сектор има околу 180 ревизори.