На плажите има крадци! СВР Охрид со засилени мерки

Добивај вести на Viber

„Превенција од кражби“ е новиот проект на СВР Охрид кој започна денеска и опфаќа широк спектар на мерки што ќе ги преземе полицијата за сузбивање на кражбите особено на плажите.

Според портпаролот на СВР Охрид м-р Стефан Димоски во летните месеци јули и август се забележува благ пораст на овие казнени дела како резултат на зголемената фрекфенција од луѓе.

„Во текот на минатогодишната туристичка сезона забележавме 13 кражби и една тешка кражба кои се случиле на плажите и на паркинзите околу  плажите. Токму затоа излегуваме со оваа промотивна кампања бидејќи сметаме дека е потребна едукација на граѓаните, туристите и на целокупната јавност, во насока на зголемување на нивната безбедносна култура и подигнување на свеста за поголема одговорност кон своите предмети“,појаснува Димоски.

Началникот на Секторот за внатрешни работи Охрид Зоран Сарафилоски за борбата за намалување на ваквите казнени дела се применуваат сеопфатни мерки.

„Покрај превентивното делување на лице место, делуваме и репресивно со примена на посебни оперативно тактички мерки со други мерки на терен коишто во интерес на работата полицијата ги презема затскриено. Бележиме успешни резултати со овие мерки. Досега откривме многу сторители кои доаѓаат од другите градови и вршат одредени кражби во Охрид, особено за време на туристичката сезона“, нагласи Сарафилоски.

Проектот „Превенцијата од кражби“ ќе се спроведува на охридско-струшкото крајбрежје со финансиска поддршка од ОБСЕ, а во соработка со велосипедската полиција и волонтерите на Црвениот крст.