Нафтата порасна, од вторник ќе точиме поскап бензин?

Добивај вести на Viber

Терминските цени на нафтата во текот на тргувањето во Азија пораснаа, после прогнозираниот пад на американското производство од шкрилци.

Цените на нафтата пораснаа и поради очекувањата дека кинеската влада ќе најави поттикнувачки пакет за раздвижување на забавената економија.

Американската „лесна“ нафта  (WTI) за испорака во мај поскапела на Њујоршката берза 45 центи на 52,36 долари, додека нафтата од типот „брент“ за мајска испорака во Лондон поскапела 51 цент на 58,44 долари, пренесува Франс прес.

Проценките на аналитичарите се дека падот во американското производство на нафта ќе помогне во намалување на прекумерните глобални залихи, кои од јуни минатата година ги преполовија цените на „течното злато“ додека стимулативниот пакет во Кина би можел да поттикне побарувачка во таа земја.

Американската Агенција за енергетски информации соопштила вчера дека производството од шкрилци во САД во мај веројатно ќе падне, што според оценките на њујоршката агенција Блумберг, беше прв пат оваа агенција да прогнозира пад на производството откако во 2013 година почнала со објавување на извештајот за месечно производство на нафта.

Во меѓувреме, падот на кинескиот извоз во март за неочекувани 15 одсто, на 144,57 милијарди долари, и намалување на увозот за 12,7 одсто на 141,49 милијарди долари, поттикнаа очекувања дека наскоро ќе дојде до движење на новиот стимулативен пакет во втората светска економија.

Ако се имаат предвид денешните цени, можеме да очекуваме значително поскапување на горивата.

Имено, минатиот понеделник, регулаторот ја формираше цената на горивата во Македонија врз основа на просечната цена на суровата нафта која тогаш на берзата во Лондон изнесуваше 54,5 долари за еден барел, а курсот на денарот во однос на доларот беше 57,9 денари.

Во моментов, барел нафта чини скоро 4 долари повеќе од пред една недела, а еден долар се продава за 58,4 денари. Доколку се задржи ваквиот тренд можеме да очекуваме значително поскапување на горивата во Македонија кое би се движело меѓу 3 и 4 денари по литар.

Еуросупер од 95 октани се точи за 67,5 денари, 98 октанското гориво чини 69,5 денари по литар. Цената на овие горива не претрпе корекции минатата недела. Дизелот минатиот понеделник поевтини за половина денари и сега се продава за 53 денари по литар.