Награда за Скопје – има најдобар јавен превоз за туристи во светот?

Добивај вести на Viber

Скопје е пофален за својот одличен јавен превоз и за групен туризам. Градот ја доби  наградата „Градски трофеј 2013“ што на две години ја доделува Меѓународната унија за патен транспорт (ИРУ) за  градските политики за одржлив транспорт, мобилност и ефикасен јавен превоз. Наградата во име на градот, денеска во Белгија ја прими градоначалникот Коце Трајановски кој се заблагодари и ги покани сите да го посетат Скопје. „Градот Скопје во последниве некоку години интензивно работи на подобрување на патната инфраструктура и на јавниот превоз, на збогатување на туристичката понуда, на промоција на организирани туристички посети со водичи и со туристички автобуси, како и на приближување на сите туристички дестинации во Скопје и во неговата околина до посетителите. Во истата насока продолжуваме и натаму. Упатувам искрена покана до сите патници намерници да го посетат Скопје и со себе да понесат незаборавни спомени“, истакна Трајановски. Заедно со Скопје, во првата петорка се нашле и градовите Малме, Ковентри, Ливерпул и Виена.Наградата отишла кај Скопје поради тоа што жири комисијата била импресионирана од квалитетот и сеопфатноста на досието доставено од Скопје, вели Ив Манерт, потпретседател на ИРУ и член на жирито за „Градски трофеј“. „ Интернационалното жири смета дека, иако се уште има простор за подобрување, презентацијата на Скопје се истакна меѓу другите досиеја поради силното политичко водство, посветеноста и „срцето и душата“ вдахнати во него, од сите оние што придонесуваат за имплементација на цврстата политика на градот, која е проактивна и наклонета кон автобускиот превоз и групниот туризам, истовремено промовирајќи го имиџот на автобусите и туристичките автобуси, и пред граѓаните и пред посетителите“, додаде Манерт за кого Скопје е пример на кој треба да се угледаат европските метрополи. Како член на Меѓународната унија за патен транспорт е Стопанската интересна заедница за патен транспорт „Македонија Сообраќај“ АМЕРИТ. Во неа пак членува ЈСП Скопје.