Најдобрите канадски бизнис практики и професионално усовршување во фокусот на Студиската Тура на Македонија2025

Добивај вести на Viber

Во организација на Македонија2025 во периодот од 29 јуни до 10 јули се одржа третата по ред студиската тура во Торонто, Канада.

Група македонски извршни директори, менаџери и претставници на бизнис секторот, предводени од Македонија2025, остварија значајни работни посети во околу 15 канадски компании. Посетите беа организирани во насока на стекнување нови искуства и знаења, остварување нови контакти како и можности за идна соработка.

На учесниците во студиската тура, им беа претставени многу новини во водењето бизнис во Канада, како имплементирање на проекти за опслужување на клиенти, алтернативни финансиски инструменти и иновативни ИКТ решенија и софтвери.

Поголемиот дел од претставниците на компаниите кои беа посетени се успешни професионалци од македонската дијаспора и искажаа голем интерес за соработка со Македонија. Исто така беа посетени и канадски компании, како на пример  Ronald Chisholm од прехрамбената иднустрија, која веќе соработува со македонски компании.

Покрај Ronald Chisholm, беа посетени и следниве компании: Service Works Group, Honeywell, St. Joseph’s Hospital, CSA Group, Deloitte Canada, Go Transit, Conundrum Capital, Cross Link Bridge, Telus, Purpose Investments, Richard Ivey School of Business, Gibraltar Company и други.

Во текот на студиската тура, учесниците исто така имаа можност да ја посетат извршната програма за водење одржлива стратегиска промена во бизнисот на Школата за Бизнис, Шулих дел од Јорк Универзитетот во Канада. Целта на оваа програма е да се осмисли и промени стратегијата на водење бизнис во една компанија.

„Целата студиска тура беше одлично искуство. Компаниските посети беа беспрекорно организирани. Слушнавме многу успешни приказни, искуства и се стекнавме со знаења за една нова бизнис култура, што ќе претставува добар почеток за влез на нови пазари.“- изјави Павле Грнаров, извршен директор на Завар Компани, Скопје, кој беше еден од учесниците.

Во истиот период се одржа и традиционалната средба со дијаспората чиј домаќин беше Џон Битов Помладиот, ко-основач и член на одборот на директори на Македонија2025.

На настанот присуствуваа над 60 гости меѓу кои и успешни претставници од бизнис сферата на Канада со македонско потекло.

Македонија2025 верува дека искуствата стекнати во овие две недели ќе им помогнат на учесниците во понатамошната работа одржувањето контакти со нашата дијаспора, како и дека новите знаења ќе бидат применети во водењето бизнис и пласман на конкурентни македонски производи во светот.