Намалена невработеност и најбарани работни позиции според Агенција за вработување

Добивај вести на Viber

Во Макеоднија моментално има 7.145 слободни работни места објавени на веб страницата на Агенцијата за вработување.

Дел од огласените работни позиции се: специјалисти за човечки ресурси, молери, продавачи, раководители на производство, специјалисти, комерацијалисти, возачи, обезбедувачи на лица и имот, електромонтери, бравари, општи амдинистратори, директори, дистрибутери, службеници за организирање патувања итн.

Според статистичките податоци во првиот квартал од годинава стапката на слободни работни места изнесувала 1,68 отсто, а најголем број слободни работни места, 2.929, биле во групата „Работници во услужни дејности и продажба“.

Според анкетата на работна сила, покрај услужниот, и индустрискиот и градежниот се сектори со најголем раст на вработеноста во првиот квартал од годинава. Стапката  на  вработеност во првиот квартал изнесува 44,6 проценти и во однос на истиот период лани е повисока за 0,9 процентни поени.

Бројот на вработени лица  е повисок за  2,2 процента, односно за околу 16 илјади лица во однос на истиот квартал минатата година, при што најголем раст на вработеноста има во индустрискиот сектор (8,7 илјади или 5,2 проценти), по кој следуваат градежниот (4,8  илјади или 9,4 проценти) и услужниот сектор (2,7 илјади или 0,7 проценти).

Гледано според економскиот статус, кај сите категории има раст на вработеноста, освен кај семејните работници. Така, бројот на вработени лица е зголемен за 13,5 илјади или 2,4 проценти, а бројот на работодавачи за 3,2 илјади или 9,4 провценти

Растот на вработеноста е придружен со пад на бројот на невработени, којшто е намален за приближно 12 илјади лица, односно 5,4 проценти на годишна основа. Таквите движења на пазарот на трудот предизвикале стапката на невработеност во првиот квартал годинава  да се намали на 21,6 проценти, односно за 1,3 процентни поени споредено со истиот квартал во 2017 година.

Додека според старосната граница, невработеноста е намалена кај сите групи, при што најзначајно намалување има кај централната возрасна група од 25 до 49 години, а која изнесува 21 процент. Бројот на активното население е зголемен за четири илјади  лица, односно за 0,4 проценти на годишна основа.

Активното население во првиот квартал 2018 година претставува 56,9 проценти од вкупното работоспособно население и е повисоко за 0,2 процентни поена споредено со истиот квартал лани. Додека пак, Просечната месечна нето-плата по вработен, во мај годинава изнесува 24.509 денари..