„НЕ МОЖЕ ЛЕКТИРА ШТО ЈАС СУМ ЈА ЧИТАЛ, ДА ЈА ЧИТА И МОЕТО ДЕТЕ“: Конечно МОН организира јавна дискусија за нов лектирен список

Добивај вести на Viber

Изминатите години со напреднувањето на технологијата и со напредокот на децата, се погласна е полемиката за неусогласеноста на лектирите кои ги читаат учениците во основните училишта.

Фактот што некои лектири едноставно не одговараат со времето во кое живеат децата, го потврдуваат родителите кои во изјави за Фактор, велат дека на децата првично не им е познат јазикот на пишување, бидејќи во времето кога се пишувани, се користени многу поинакви изрази од овие денес, а и тематиката која старите лектири ја обработуваат едноставно не е интересна за денешните генерации.

„Јас сум генерација 1986, генерација кога домашното воспитување и образование беше на многу поинакво ниво од ова што е денес. Еве ќе ја земам за пример лектирата Грдото пајче, каде отворено се зборува за ловење на патки, пукање, во лектирата се споменува крв... моето дете кое денес го едуцирам дека убиството на животни е подеднакво лошо како и убиството на човек, е принудено да ја чита таа лектира. Да, тие лектири беа убави во наше време, но денес, воопшто не соодејствуваат на времето во кое децата живеат“, вели Фросина Х. мајка на дете кое оди во второ одделение.

Според родителите постојат и лектири кои останале интересни и за денешните генерации како „Доктор Офболи“, „Пајажината на Климентина“ и сосема е во ред тие наслови да продолжат да бидат дел од лектирниот список.

„Државата мора да оди во чекор со времето, не може на дете кое е технолошки потковано, игра на компјутер, вие да му дадете лектира која за него ќе биде досадна и нема да му го привлече вниманието. Сега слушам дека МОН конечно прави напори да ги смени лектиниор список и тоа особено ме радува“, вели Мирјана Стојановска, мајка на дете во петто одделение.

И наставничките сметаат дека лектирите мора да се сменат. 

„Како прво, ваквите лектири кои што се бараат учениците не сакаат воопшто да ги читаат. Не ги разбираат и имаат проблем со зборовите што се користат. Тоа се сепак постарски зборови кои денес речиси никој и не ги употребува. Добивав и забелеѓки до родителите дека биле принудени да им објаснуваат на децата при читањето затоа што едноставно, не разбираат“, вели Кате.М, наставничка во основно училиште,

Вчера и официјално одекна информацијата дека Министерството за образование и наука и Бирото за развој на образованието организираат јавна дискусија за нов предлог-лектирен список за основното образование. Оттаму упатија и покана до сите заинтересирани страни – наставници, стручни служби и други чинители во образованието, активно да се вклучат во дефинирање на современ, инклузивен и квалитетен лектирен список, кој ќе одговара на реалните потреби на учениците и наставниот процес.

„Потребата од ажурирање на лектирниот список произлегува од стремежот за постојано усогласување на наставните содржини со современите образовни цели, развојните карактеристики на учениците и нивниот социјален и емоционален контекст. Предлог-списокот е изработен врз основа на списокот што се реализира во наставата од учебната 2019/2020 година. Одредени наслови се отстранети поради ниска читаност, несоодветност на возраст или содржина. Поради промени во наставните програми и интердисциплинарно поврзување во наставата, некои дела се преместени во друго одделение или добиле нов статус – од задолжителни станале изборни и обратно“, информираа од МОН.

Како што велат оттаму, во предлогот се вклучени дела што обработуваат современи и значајни теми, меѓу кои: идентитет и самодоверба, пријателства и меѓучовечки односи, училишен живот и булинг, емоционални и психолошки предизвици, културна разноликост, инклузија на деца со посебни образовни потреби.

„Целта е учениците да читаат содржини блиски на нивната реалност, но и доволно слоевити за анализа и симболичко толкување, што ќе поттикнува критичко размислување, дискусија и личен развој“,инфомираа од МОН.