НЕМАЛО ЛЕКАР ВО БРЗАТА ПОМОШ: Момче починало на улица

Добивај вести на Viber

Во Запрешиќ во Хрватска се случи трагедија, при што 21 годишното момче М.Р. починало, а според изјавите на сведоците кои први пристигнале во помош, смртта можела да се спречи, но здравствениот систем затаил.

Ова се случило околу 19 часот на улицата Станко Враж во Запрешиќ, а еден од сведоците кој меѓу првите стигнал да помогне, на социјалните мрежи опиша што се случило.

Тој вели дека на момчето му се слошило на улица, по што заедно со уште две лица кои наишле, тргнале да му помагаат додека се гушел.

Му го држел јазикот под прстите да не би се задушил, а со прстите му го пипкал пулсот кој од минута во минута бил се послаб и послаб. Другите кои стигнале во помош викнале Брза помош два пати, а кога дошло возилото во него немало доктор.

Освен тоа, во возилото немало ниту дефибрилатор, па првата помош му ја давале техничар, сестра и случајна минувачка која била медицинска сестра. После некое време стигнало и друго возило на Брза помош. И тие тргнале со реанимација на момчето, но предоцна.

„Ова е проблем, а не паркинг места и глупости. Можеби ова ќе биде вашето дете, не дај Боже, а доктори нема да има, затоа што одлучија дека еден бил доста за цел Запрешиќ. Се тресам од бес додека ова го пишувам. Не се криви луѓето кои работат во Брза помош, туку луѓето кои велат дека не треба два доктора во Брза помош и ги тераат да го работат она за што не се школувани, а ниту платени“- напишал Дамир, еден од сведоците кој пристигнал да му помогне на М.Р. и ја опиша целата случка на социјалните мрежи.

Хрвоје Љаљак, кој исто така бил на местото на несреќата додал дека кога техничарот и медицинската сестра од Брзата помош стигнале и ја виделе состојбата во која момчето се наоѓа, во паника кажале „Па не ни кажавте дека се работи за ваква состојба“.

Од централата во Запрешиќ до местото на несреќата им требало околу 15 минути, иако се наоѓа на оддалеченост од 600 метри. Тој додал и дека дошле целосно неподготвени, без дефибрилатор, а од опрема имале само четири фластери и спреј Бивацин.