Непроценливо богатство е украдено од Музејот на Македонија!

Добивај вести на Viber

60 златни реликти меѓу кои обетки, прстени и копчиња како и голем број предмети од античкиот период се украдени од Музејот на Македонија, информираа од МВР. Според првичните сознанија на истрагата,  најголем дел од украдените предмети потекнуваат од ископувања од Стоби и Исар Марвинци, а за нив задолжени биле двајца кустоси, поради што ќе се формира комисија за да ја провери документацијата на музејот. Како што истакна Иво Котевски, портпарол на  МВР, станува збор за непроценливо богатство, а најдоцна до вторник вработените во Музејот треба да се обидат детално да ја информираат полицијата за последните случувања. „Договорено е формирање на комисии кои би направиле соодветен попис на сите предмети кои се чувале во депото, за да видиме дали има и други предмети кои евентуално недостасуваат, а исто така да се направи и целосен увид во однос на лицата кои изминатиов период наназад имале пристап до депото и влегувале внатре,“појасни Котевски кој додава дека ова се прави за точно да се утврди дали некој од вработените кој имал пристап до депото изнесувал или преместувал некои од вредните предмети. Засега нема наоди дека некој влегол насилно во депото, а  нема ниту осомничени. Музејот го обезедува агенција, а покриен е и со видео надзор кој ги снима влезовите во објектот. Кражбата беше пријавена пред неколку дена, а вработените не знаат точно кога се счучила, туку проблемот го пријавиле кога забележале дека недостасуваат преднети во депото на Музејот.