„НИЕ НЕ СМЕ НАЈБОГАТАТА ПАРТИЈА ВО НАЈСИРОМАШНАТА ДРЖАВА“: Левица се огласи со појаснување - имотот е купен од банка

Добивај вести на Viber

По бројните препукувања во јавноста поврзани со имотот на Левица, за чие купување објави премиерот Христијан Мицковски, и за што од неговата партија ја обвинуваат опозицијата за лицемерие, денес реагираат и од Левица. 

- Својата криминогеност ВМРО-ДПМНЕ не може да ја преслика на Левица - партиските простории се транспарентно и легално купени со хипотекарен кредит.

Идејата за купување на простории дојде од деветгодишното постоење на Левица и сметаме дека е време да ги обезбедиме нашите први простории како политичка партија. Мицкоски и ВМРО-ДПМНЕ, обидувајќи се криминалот кој тие го имаат создадено преку својата „бела палата” која чини 60 милиони евра и за која плаќаат над 10.000 евра сметки за струја месечно, знаејќи дека целата јавност има веќе оформено став за нивниот криминоген имот - пробаа таа флека да ја пресликаат на други партии, но неуспешно - се наведува во соопштението од Левица испратено до медиумите. 

Додаваат дека премиерот мавташе со документите за овие простории како да се тајни, а всушност сите тие се достапни во катастарот за недвижности. Укажуваат дека просториите подолго време стоеле празни и секој заинтересиран можел да ги разгледа и набави бидејќи биле изложени со натпис.

- Ова е дел од една поширока „стратегија” на ВМРО-ДПМНЕ која ја гледаме во последните денови, во која напаѓаат синдикалци и сѐ она што се однесува на нив, пробувајќи да ги поистоветат сите други општествени чинители со нивната криминогеност за да пробаат да ја „израмнат работата” и да бидат повторно некако над сите.

Претставуваат како Левица да зела цела зграда, кули, хотели, а всушност земавме подрумски простории кои беа руинирани. И се работи за хипотекарен кредит кој е земен, не од банката која го нудеше овој имот, туку од друга банка - се обезбедија средства да се купат просториите и тие да се реновираат.  Ние не сме најбогатата партија во најсиромашната држава и ние нашите простории ги обезбедуваме на легален и многу транспарентен начин - укажуваат од Левица. 

Потоа додаваат дека во целата приказна со просториите, нема никакво посредство со извршител. 

- Не се наоѓаме во морална стапица, сметаме дека идеолошки, прагматично и во пракса дека приватните извршители се погрешна работа и повторно ќе поднесуваме закони во врска со нив - потенцираат од партијата.