Никој уште не знае колкава е штетата во „Прохор Пчињски“

Добивај вести на Viber

Доцни расчистувањето на отпадот од дворот на манастирот „Св. Прохор Пчињски“, кој неделава беше зафатен од пожар. Се чека дозвола од српскиот Завод за заштита на природата, бидејќи манастирот се наоѓа во заштитено подрачје, а дури потоа може да започне расчистувањето. Според врањскиот епископ Пахомије, додека не се расчисти она што остана од Кралскиот конак не може да се утврди причинетата штета и да започне обновата. „Веднаш за пожарот ги известивме сите институции, како на локално, така и на републичко ниво. Заводот за заштита на спомениците од културата од Белград дојде меѓу првите, а беа и инспекции од Врање на чело со општинскиот обвинител, кој зеде примероци и се што беше потребно за утврдување на причините за пожарот“, вели епископот Пахомије. Во конакот немало мебел и многу работи, затоа што се уште било во тек неговото реновирање, а од црковните работи изгорел голем крст од 18-от век, кој заради димензиите не можел да стои во црквата. Откако противпожарните екипи успеале да го локализираат пожарот, заедно со верниците и свештенството цела ноќ и цел ден дежурале за целосно да го изгаснат. „Не може ништо да се планира додека комисиите на Заводот за заштита на споменици не го утврдат степенот на оштетувањето и додека не се изработи проект за санација, по кој ќе се планираат и средствата“, вели директорот на Канцеларијата на српската Влада за соработка со црквите и верските заедници Милета Радојевиќ. Засега нема докази дека пожарот бил подметнат, иако во септември 2013-та во дворот на манастирот, во близина на Кралскиот конак избувнал пожар за кој подоцна било утврдено дека е подметнат. Манастирот Св. Прохор Пчињски има огромно историско значење и за Македонија, како локација каде што се одржало Првото заседание на АСНОМ на 2-ри август 1944 година. Веќе неколку години, заради несогласувањата со Српската православна црква, македонска делегација не оди во Св.Прохор Пчињски за Илинден, туку настанот го одбележува во реплика од манастирската сала во која се одржа заседанието, во меморијалниот центар Пелинце.