Никола Димитров бара казна од 6.000 евра за Наум Стоилковски
Објавено во: Македонија 07 Јули, 2020
Државната изборна комисија на денешната седница се прогласи за ненадлежна на барањето на министерот за надворешни работи Никола Димитров да се казни портпаролот на ВМРО-ДПМНЕ, Наум Стоилковски, од 2.000 до 6.000 евра поради ненајавениот упад што му го направи пред една недела на брифингот како носител на пратеничката листа на СДСМ и колаицијата во изборната единица 1.
Димитров пред Јавното обвинителство зборуваше за стапувањето во сила на новиот Закон за јавното обвинителство, кога Стоилковски со повишен тон го прашуваше за новата аудио снимка поврзана со еден црнгороски бизнисмен.
Никола Димитров поради ова побарал од ДИК глоба од 2.000 до 6.000 евра за попречување на настан поврзан со парламентарните избори на 15 јули но ДИК се изјасни дека не е надлежен орган и му порача на министерот да поднесе тужба против Стоилковски во Основен суд.