Добивај вести на Viber
Никола Поповски, поранешен министер за финансии за Фактор вели дека, за годинава според веќе донесениот буџет државата и натаму многу ќе се задолжува државата, а можноста за динамичен раст и предвидлива иднина практично и да не постои.
Фактор: Како ја оценувате 2013 година на еконмски план?
Поповски: Минатата 2013 година не ни донесе ништо подобро на економски план. Останаа многу од постојните економски проблеми (висока невработеност и сиромаштија, низок економски раст, малку странски а исплашени домашни инвеститори, големи дефицити во буџетот и трговскиот биланс, раст на задолжувањето на земјава, намалување на животниот стандард) без да видиме јасна стратегија за закрепнување на економијата. Надлежните ниту понудија нешто повеќе од она што по навика го нудат секоја година. Се јавија и проблеми на сериозно продлабочување на социјалните разлики. Економијата практично ни функционира само во корист на државните моќници и сопствениците на крупниот капитал.
Фактор: Какви се прогнозите за економијата во 2014 година ?
Поповски: Слична ќе биде состојбата и во оваа 2014 година. Не постои ниту нова визија, а се чини ниту желба за економски промени. Основните надежи на надлежните и понатаму се насочени кон екстерните факторите за индиректна обнова на македонската економија - надеж за обнова на економиите во ЕУ што би ја повлекле и нашата економија, барање на кредити за изведување на јавни работи или пак некоја странска приватна инвестиција што би ги решила домашните проблеми. Но тоа е јасно дека нема да се случи, а официјална надеж во сопствените сили не постои.
Нема веќе надеж ни за напредок во европските интеграции. Јасно е само, согласно донесениот буџет, дека и во 2014 година многу ќе се задолжува државата, а проблемите ќе останат и понатаму. Можноста за динамичен раст и предвидлива иднина практично и да не постои.