НИВОТО НА ВАКЦИНАЦИЈА НЕ ДОВОЛНО ЗА ЛИБЕРАЛИЗАЦИЈА НА МЕРКИТЕ: Министерот Сали ја прими бустер дозата

Добивај вести на Viber

Министерот за здравство Беким Сали, кој денеска ја прими засилувачката доза на вакцината против корона вирусот на вакциналниот пункт на Економскиот факултет во Скоје, изјави дека и во иднина здравствените политики ќе бидат насочени кон промоција на вакцинацијата.

-Оттука сакам да упатам еден апел пред се бидејќи нашата држава, нашиот народ има потреба од стимулација на вакцинирањето. Досегашното ниво, досегашниот процент на опфатот на вакцинација против ковид-19 не е доволен да кажеме дека сме една од државите која треба да пристапи кон либерализација на мерките против корона вирусот, рече министерот Сали.

Во однос на тоа како да веруваат граѓаните на вакцините кога секојдневно слушаат дека една третина од починатите се токму вакцинирани, кога нема доволно информации во однос на тоа дали починале директно како последица од ковид или пак биле позитивни на вирусот но починале од друга сериозна здравствена состојба, министерот Сали рече дека во прашање е воспоставената методологијата на известувањето.

-Од почетокот на пандемијата во Македонија секое лице кое е позитивно на вирусот е регистрирано дека е починато со ковид иако тоа по автоматизам не значи дека последиците биле од ковид. Затоа и во регионот најверојатно сме од државите кои имаат поголем број починати, но не сме здравствен систем кој не ги згрижил тие пациенти, Во другите држави методологијата е поинаква, имаат подруг пристап, па затоа не треба да не збунува зошто кај нас има 8.000 починати а во околните држави само по 2-3 илјади, рече Сали.

А.Б.