Нова демократија има проблем со македонскиот јазик и идентитет?

Добивај вести на Viber

Грчката опозициска партија Нова демократија бара одговори од грчката Влада за вчерашните ставови на премиерот Зоран Заев, изнесени на прес конференцијата во Скопје за тоа дали премиерот Алексис Ципрас веќе прифатил признавање на македонски јазик и македонски идентитет. 

Прашуваат дали тој  се повлекол од националната позиција за ерга омнес име и дали веќе се обврзал да дозволи интеграција на Македонија во НАТО, „без да бидат отстранети од Уставот сите неприфатливи иредентистички наводи“.

„Премиерот на ПЈРМ, Зоран Заев, изјави дека не само што „во принцип веќе постои договор“ со Алексис Ципрас, туку дека „Грција ќе испрати писмо до НАТО за ПЈРМ да добие покана за членство во Алијансата. Откри дека „македонскиот“ јазик и идентитет на граѓаните на неговата земја „веќе се гарантирани од планираниот договор со Грција“ и дека и самиот „копнее за Македонија во која граѓаните се ослободени од предрасудите и стравовите од минатото“- пишуваат од Нова демократија во соопштението со прашања до грчката Влада и бараат Ципрас и Каменос „престанат да се кријат“ и веднаш да ги известат грчките граѓани.

Од кабинетот на Ципрас одговорија дека Нова демократија не треба да брза, бидејќи до овој момент не постои никаков договор и ги повторија позициите на грчката Влада дека предуслов за решение и интеграција на Македонија во НАТО и ЕУ е договор за сложено име со географска или временска одредница, ерга омнес, за што предуслов е уставна ревизија.