Нова фабрика ќе се гради во индустриската зона „Жабени“

Добивај вести на Viber

Денеска во индустриската зона „Жабени“Градоначалникот на општина Битола Владимир Талески, додели трето решение - одобрение за градба на нова фабрика во зоната.

Третата фабрика, како што информираше на денешната средба со новинарите,  ќе биде ориентирана на производство на пластична амбалажа за прехранбената и хемиската индустрија, на површина од 4.000 квадратни метри.

- Во наредниот период ќе доделиме уште пет други одобренија за градба со што покрај германскиот инвеститор „Кромберг и Шуберт“ во индустриската зона „Жабени“ ќе се издигнат уште шест фабрики, заедно со веќе одобрената за градба фабрика ориентирана во млечната индустрија, истакна Талески.

Инвеститор на новиот стопански објект во индустриската зона „Жабени“ е поранешниот македонски фудбалски селектор Мирсад  Јонуз чија фирма е со седиште во Скопје, но одлучила своите производствени капацитети да ги прошири во Битола.

- Со подобрување на временските услови веднаш ќе стартуваат градежните работи за нашата фабрика. Овој капацитет ќе произведува пластична амбалажа за потребите на прехранбената и хемиската индустрија, изјави Џевдет Фејзуловски, претставникот на фирмата инвеститор.

Талески најави и нови инвестиции во поранешната битолска касарна, гасификација и топлификација за што има поддршка од Владата на Република Македонија и изградба на две нови детски градинки во Битола.