НОВА КАТНА ГАРАЖА ОКОЛУ ЛЕПТОКАРИЈА, ЗЕЛЕН ПАРК ВО КАРПОШ 4: Весковски зборува за романтично Тафталиџе, урбано Злокуќани
Објавено во: Македонија 27 Септември, 2021
Карпош е интелектуален, економски, социјален и еколошки двигател на Град Скопје, вели кандидатот за градоначалник на Карпош од СДСМ и Коалицијата Душко Весковски. Тој денеска во обраќање ги претстави клучните поенти од визијата која ја има за општината. Вели дека е одлучен целосно да го искористи овој потенцијал преку поставување и одржување на уште повисоки стандарди на хумано и планско урбано живеење. Мотото за кампањата е „Најдоброто за Карпош“, а Весковски вели дека ќе води позитивна кампања, со почит и разбирање за потребите на граѓаните.
„Карпош ќе стане општина со најголем процент на зелени површини, неверојатно чиста,
наклонета за велосипедистите и организирана за автомобилистите.
Карпош го живееш во младоста, но не го напушташ ни во староста.
Визијата за Млечен и Делфина, за Лептокарија и Карпош 1,2 и 3 и за паркот во Карпош
4, за Влае крај Вардар, за планската урбанизација на Злокуќани и Бардовци, за
романтичното Тафталиџе, преку Козле кон Трнодол и Жданец, можеме заеднички да ја
оствариме ако на 12-ката победа и подариме, оти животот не е само она што ни се
случува додека го кроиме, туку и кога за него се бориме, вели Весковски во објавата.
Најавува изградба на катна гаража околу комплексот ТЦ „Лептокарија“, со зелен парк над гаражата, изградба на две нови детски градинки и реконструкција на постојните капацитети, изградба на голем зелен парк во Карпош (спроти населбата Карпош 4), дисперзирање и планска хумана урбанизација на просторот кон Злокуќани и Бардовци, високо ниво на комунална хигиена, Карпош ФИТ – програма, решение за проблемот со паркирањето, младински центар во Општина Карпош, субвенционирање на еколошки превоз за млади.