Нови соларни системи за вода во две училишта во Карпош

Добивај вести на Viber

Општина Карпош продолжува со реализација на проектот за заменување на електричните бојлери со соларни вакуум инјекторски системи за топла вода во сите училишта и градинки на својата територија. Нови соларни системи за вода поставени се во основните училишта „Владо Тасевски“ и „Војдан Чернодрински“.

Новите системи во овие училишта, информира општина Карпош, ќе овозможат користење санитарна топла вода во текот на 365 дена во годината, ќе се користат во туш кабините во спортските сали на овие две основни училишта, за потребите на учениците во редовна настава, како и за спортските екипи кои ги користат салите за тренинзи.

Користењето на енергијата од сонцето овозможува за повеќе од 80 отсто да се намали потрошувачката на електрична  енергија од постојните шест електрични бојлери за топла вода.

Според програмата за 2013 година, општина Карпош гради уште 43 соларни системи во училиштата и градинките, а веќе се инсталирани 23. Со тоа, како што се наведува во соопштението, целосно ќе се заменат сите електрични бојлери во овие објекти кои се во надлежност на општина Карпош.

Инвестицијата за енергетска ефикасност општина Карпош ја спроведува со сопствени средства.