Обвинение за напаѓачот на Горан Милевски, се бара и притвор
Објавено во: Македонија 04 Април, 2018
Основното јавно обвинителство Скопје (ОЈО) информираше дека поднело обвинение против напаѓачот на пратеникот Горан Милевски, кој е и претседател на Либерално-демократската партија (ЛДП).
„Денеска надлежен јавен обвинител од Основното јавно обвинителство Скопје поднесе Обвинителен предлог против едно лице за сторено кривично дело Насилство од член 386 став 3 во врска со став 1 од Кривичниот законик. На 25 март годинава, обвинетиот на плоштадот Македонија физички нападна пратеник на Собранието на Република Македонија. Идентитетот на обвинетиот беше утврден по јавување на граѓани откако по налог на Основното јавно обвинителство Скопје беше објавена неговата фотографија од страна на Министерството за внатрешни работи“, наведува Обвинителството во соопштението.
Обвинителството од судија на претходна постапка побарало и притвор за напаѓачот.
Нападот се случи на 25 март годинава на плоштадот Македонија во Скопје.
Милевски тогаш изјави дека е можно нападот да бил поради изгласаниот Закон за употреба на јазиците.