Од буџетскиот колач 3,1 милијарди денари за културата во 2019-та
Објавено во: Економија 27 Ноември, 2018
3,1 милијарди денари од предлог буџетот за следната година одат во Министерството за култура
Буџетот на самото Министерство изнесува 215,5 милиони денари, додека на буџетот за финансирање на дејностите од областа на културата припаѓаат 2,9 милијарди денари.
– Над 92 осто од планираните средства од вкупниот буџет на Министерството за култура се предвидени за финансирање на дејностите од областа на културата, околу осум отсто се предвидени за трошоците на администрацијата на Министерството, соопшти министерот за култура Асаф Адеми.
Тој потенцира дека во Предлог-буџетот за следната година има зголемување на средствата во ставката разни трансфери, односно има директно зголемување за културните активности. Во 2018 година во оваа ставка биле одобрени 904 милиони денари, а во 2019 година се предвидени 936 милиони денари или 32 милиони денари поголем буџет од лани.
– Годинава 32 отсто од разделот дејности од областа на културата се предвидени директно за културни активности што претставува највисок процент и вредност споредбено со претходните години, рече Адеми.
За Агенцијата за филм на Република Македонија за разлика од лани, кога биле одобрени 150 милони денари за програмски активности, во овој Предлог-буџет се предвидени 170 милиони денари или зголемување од над 13 отсто. Истиот процент важи и за зголемувањето во трансферите за фолклорна и сценско-уметничка дејност.