Добивај вести на Viber
Министерството за финансии го објави јавниот повик до граѓаните за еднократен отпис на долгови за најранливите категории. Од понеделник во Центрите за социјална работа ќе можат да се пријават граѓаните кои сметаат дека ги исполнуваат законските услови за отпис на долговите.
Еднократното простување на долговите за струја, греење, кредити важи за корисниците на социјална и постојана парична помош, невработени лица подолго од 12 месеци и лицата кои се изложени на социјален ризик поради смрт на брачен другар или инвалидност или потешка болест настанати во последните пет години.
„Постапката е едноставна- граѓанинот треба да пополни основни податоци, име и презиме за себе и за брачниот другар и да пополни во формуларот каков вид долг има. Граѓанинот со себе треба да носи лична карта и лична карта на брачниот другар. Тие ќе треба да потпишат изјава со која ќе дадат согласност за државните институции да можат по службена должност да ги набават сите други потребни документи од државните институции со цел постапката да биде поедноставна за граѓаните и да мера да одат по шалтери да ја обезбедат потребната документација“, објави вицепремиерот и министер за финансии Зоран Ставрески.
Ќе се отпишуваат долговите настанати до 31 декември 2013 година, а по основ на потрошена електрична енергија, топлинска енергија, за кредитни картички, пречекорувања на трансакциски сметки и потрошувачки кредити класифицирани во категорија Г и Д од страна на банките, а кои не се обезбедени, како и за радио дифузна такса. Со мерката заедно со главниот долг предвидено е да се отпишат и каматите, како и трошоците за нотари и извршители.
Според Ставрески, интересот кај компаниите кон кои должат граѓаните за вклучување во овој проект бил голем, а со нив во текот на следната недела Владата ќе потпише договори. За да ги отпишат долговите, тие ќе добијат право на даночен кредит во висина на одреден процент од долгот, кој нема да биде повисок од 10% од отпишаниот долг.
„Со реализацијата на овој проект, Владата значително ќе им помогне на најранливите категории на граѓани кои поради влошените финансиски услови и последиците од долготрајната европска и светска криза не можеле да ги платат обврските навреме“, потенцира Ставрески.
Проценките се дека со мерката ќе бидат опфатени меѓу 50.000 и 100.000 граѓани кои имаат проблем да си ги подмират долговите.