Скопјани ќе штедат на гориво, од септември компјутер ќе ги регулира семафорите

Добивај вести на Viber

На неколку локации низ Скопје веќе се поставуваат електронски табли каде што граѓаните и возачите ќе може да прочитаат на кои улици има метеж. Според најавите, од септември ќе профункционира Центарот за управување и контрола на сообраќајот од каде ќе се регулира метежот. Идејата е зеленото светло да трае подолго, чекањето да биде пократко, а освен заштедата во време и покусите патувања без нервози, граѓаните ќе штедат и бензин, а аерозагадувањето ќе се намали. Како што пишува Дневник,  носечката улога во системот ќе ја има „умната“ компјутерска програма. Софтверот ќе брои и памети колку возила се движат на сообраќајниците и потоа ќе овозможува проток во било кој период од денот, месецот и годината.  Тоа функционира така што при регистриран метеж долгото зелено светло се вклучува автоматски или рачно. Посебен третман ќе имаат возилата на Противпожарната служба, Итната помош или на полицијата. Надлежните информираат дека сега со ЦУKС се поврзани 30 раскрсници, пред се, во центарот на градот, а до крајот на оваа година ќе бидат 90, од вкупно 105 во цело Скопје. „Системот постојано учи. Во моментов самиот се полни со податоци, а тоа ќе трае до средината на септември. Софтверот врши прогноза и се приспособува на критичните раскрсници со семафори. Тие, пак, комуницираат меѓу себе и знаат кога и колку возила доаѓаат од кој било дел во градот“, објаснува за Дневник Даниел Павлески, советник за анализа и управување во градскиот сектор за сообраќај. Центарот за управување и контрола на сообраќајот чини 2,6 милиони евра. Парите беа обезбедени од Градот Скопје од кредит од Европската банка за обнова и развој.