Опозицијата бара итни мерки за борба со загадувањето

Добивај вести на Viber

Веднаш штом ќе се зголеми загадувањето на воздухот во Скопје треба да се воведе бесплатен јавен превоз за сите граѓани, а сите што ќе изберат греење на чисти и нови извори на енергија да добијат субвенции од градските власти - ова се предлозите на опозицијата за борба против растечката загаденост во главниот град. Советниците на СДСМ во Градот Скопје сметаат дека не се преземаат мерки за да се спречи загадувањето на воздухот. На нивно барање во Советот на Град Скопје денеска се расправаше за мерките што има намера да ги преземе градот во следниот период. Сепак, тие се уште се само во фаза на планирање. „Сериозно сме загрижени дека и оваа година на Скопје ќе му се случи еколошка катастрофа со загадувањето на воздухот. Сметаме дека на овој проблем мора да му се даде многу посериозен пристап и дека Трајановски не смееше да чека повеќе од еден месец за да дебатираме за овој проблем. Граѓаните на Скопје заслужуваат многу посериозен пристап од страна на нивниот градоначалник“, вели Дамјан Манчевски, координатор на советничката група на СДСМ. Градоначалникот на Скопје Коце Трајановски признава дека мерките се уште не се официјално донесени. Во програмата, градските власти меѓу другото планираат возење по принципот пар-непар, бесплатен автобус, возење по обиколни улици, прскањето на улиците против прашина. Но, најрано би можеле да воведат следната година и тоа ако 10 дена по ред загаденоста на воздухот е зголемена. Бесплатниот автобуски превоз за сите граѓани ќе зависи од можноста на јавното сообраќајно претпријатие финансиски да издржи една таква мерка и дали има доволно возачи и автобуси да одговорат на таква задача. Мерните инструменти на Министерството за животна средина и денеска регистрираа зголемена загаденост на воздухот во повеќето општини во главниот град. Нешто почист воздух дишеа само жителите на Карпош.