Отчет на Јанакиески: евтино летаме, удобно се возиме, железницата ќе ја стокмиме!

Добивај вести на Viber

Набавката на автобуси, изградба на патна инфраструктура, модерницазија на железничката инфраструктура, пониски цени во авиосообраќајот, изградба на социјални станови, справување со дивите превозници, се дел од проектите со кои денеска министерот за транспорт и врски Миле Јанакиески, се пофали во отчетот за сработеното во минатата година. “ 2012-та ќе биде година во која целосно заврши проектот „Набавка на нови автобуси“. Иако многумина не веруваа, не критикуваа и тврдеа дека овој проект нема да се реализира, па дури и не обвинуваа, ние во министерството молчевме и работевме. И ги донесовме сите ветени автобуси. Сега, тие што не веруваа молчат а ние слободно може да зборуваме и да кажеме дека граѓаните се возат во нови 200 двокатни, 80 нископодни автобуси и 16 минибуси. Но, исто така граѓаните ама и туристите се возат во уште 15 автобуси со отворен покрив, за панорамско разгледување. Или вкупно, после повеќе децении низ улиците има 311 нови автобуси, изјави Јанакиески. Јанакиески се пофали и дека не ги заборавиле ниту граѓаните кои патуваат надвор од Македонија. Со авион. Ним им овозможивме почесто да бидат во облаците, летајќи кон одредена дестинација, по пониски цени на авиобилетите, со овозможувањето за влез на нискотарифната компанија Wizz Air, која започна со оперирање на 6 нови дестинации од Скопје до Малме, Базел Мулуз, Ајндховен, Дортмунд и Меминген – Минхен. “Сепак, ние во министерството останавме приземјени и продолживме со подобрување на патната инфраструктура. За оние кои патуваат со автомобил, продолжи реализацијата на проектот за развој и создавање на здрава патна мрежа на локално и регионално ниво. Се реконструираа и изградија повеќе од 320 километри локални патишта, за што беа инвестирани 14.5 милиони евра, додаде Јанакиески, посочувајќи дека на патната делница Катланово – Велес со должина од 27 километри комплетно е обновен асфалтот, поставена е современа хоризонтална и вертикална сигнализација, нови банкини, мрежа за заштита од одрони, осветлени се сите тунели, со што е подобрена безбедноста. Стартувана е и постапката за избор на изведувач на градежните работи за рехабилитација и зацврстување на 13 мостови на овој дел од коридорот 10. Инвестиција од 8.6 милиони евра во соработка со НАТО и очекувам годинава да започнат градежните работи.Но, како клучен проект се споменува автопатската делница Демир Капија - Смоквица, со должина од 28,2 километри, како дел од Коридорот Х, за која се очекува до крај на 2016 година целосно да биде изградена. Јанакиески се пофали и со повеќе стартувани инвестиции во железничкиот сообраќај со најава дека оваа година дефинитивно ќе биде посветена на железницата. Во 2012 година изградени биле 3 објекти за домување на лицата од социјално-ранливите категории со вкупно 220 станови во Битола, Штип и Берово, а целосно е завршена проектната документација за 11 нови објекти во Скопје, Струмица, Ресен, Демир Хисар, Прилеп, Македонски Брод, Пехчево, Гостивар, Кочани и Свети Николе.