Откриени пропусти – работниците во фабриката во Сопиште немале соодветна заштита

Добивај вести на Viber

Државниот инспекторат за труд открил пропусти во фирмата „Ицемак“, сопственик на фабриката за пиротехника во Сопиште, каде во експлозија минатата недела еден работник загина, а уште двајца се борат за живот, објави „Дневник“. По проверката на целокупната документација на вработените во фабриката инспекторите утврдиле дека фабриката не презела заштитни и безбедносни мерки за вработените, кои немале завршено никаква обука за безбедност при работа. Биле откриени и други пропусти заради што најверојатно во текот на денешниот ден Државниот инспекторат за труд ќе поднесе кривична пријава. Освен ова, инспекторатот најавува и прекршочни пријави за фабриката и нејзините сопственици. „Државниот инспекторат не добил известување за вршење на дејност од управителот на фабриката поради што ќе поднесеме прекршочна пријава од втора категорија. Исто така ќе поднесеме и прекршочна пријава од трета категорија, бидејќи фабриката не ги исполнувала неопходните безбедносни мерки, односно вработените немаат направено никаква обука од аспект на безбедност при работа, не биле извршени здравствени прегледи за високоризични работни места, а вработените немале лична заштитна опрема“,  изјави за „Дневник“ Слаѓана Андоновска, инспектор за безбедност и здравје при работа во Државниот инспекторат за труд.