Ова е кривичното дело за кое ќе се гонат напаѓачите на Саздовски

Добивај вести на Viber

Основното јавно обвинителство Скопје изврши преквалификација на кривичното дело за претепувањето на Никола Саздовски, по што напаѓачите ќе одговараат за убиство на свиреп начин. 

Наместо за кривично дело Насилство од член 386 став 6 во врска со став 3 во врска со став 1 од Кривичниот законик, против тројцата осомничени ќе се води истражна постапка за кривично дело Убиство извршено на свиреп начин од член 123 став 2 точка 1 од Кривичниот законик.

Ваквата одлука на јавниот обвинител следи откако во текот на истражната постапка се обезбедени вербални и материјални докази,  испитани се повеќе сведоци, беше прибавен обдукцискиот протокол од Институтот за судска медицина, криминалистика и медицинска деонтологија, а особено по изготвеното судско-медицинско вештачење извршено по наредба на јавен обвинител од страна на истиот институт.

Ова вештачење беше доставено во обвинителството на 16 јули 2018 година и од него неспорно произлегува динамиката на кривично-правниот настан во смисла на видот и карактерот на здобиените повреди кај Саздовски, а се утврдува и причинско-последичната врска на нанесените повреди и нивното влијание на смртниот исход.

Двајцата осомничени се наоѓаат во притвор во Затворот Скопје и  ќе бидат доведени пред надлежен јавен обвинител за да дадат своја одбрана за ова кривично дело.

По третиот осомничен кој засега е недостапен ќе биде распишана домашна и меѓународна потерница.

Од ВМРО-ДПМНЕ имаше обвинувања дека се заташкува случајот, а од Спасовски се бараше оставка. 

Синоќа Комитите чиј член беше Саздовски одржаа протестен марш и побараа најстрога касна за луѓето кои го претепаа момчето, по што тоа почина од здобиените повреди.