ОВАА НЕДЕЛА ЛЕКОТ ИВЕРМЕКТИН ВО АПТЕКИТЕ И ВО БОЛНИЦИТЕ: По интрвентниот увоз нова надеж за болните од ковид

Добивај вести на Viber

Антипаразитскиот медикамент Ивермектин се очекува во текот на оваа недела да се најде во македонските аптеки и болници, што според многумина експерти е нова надеж во лекувањето на болните од корона вирусот, се до пристигнувањето на вакцината.

Интервентниот увоз следува откако пред крајот на годината до Агенцијата за лекови МАЛМЕД пристигнаа барања за набавка на Ивермектинот од страна на некои веледрогерии и здравствени установи каде се лекуваат болните од Ковид-19. Неколку дена подоцна, како што за Фактор тогаш потврди првиот човек на МАЛМЕД, Лирим Шабани, Агенцијата за лекови ги издаде потребните одобренија.

Тој посочи и дека по издавање на одобренијата за интервентен увоз, болниците и веледрогериите ќе може да направат нарачки за одредени количества да увезат во Македонија.

-Дали тоа ќе биде од Турција, Грција или Бугарија, останува избор на веледрогериите и болниците, потврди Шабани за Фактор на само еден ден пред крајот на 2020.

Инаку, според микробиологот, д-р. Никола Пановски, во неодамнешна изјава за Фактор појаснува дека станува збор за лек кој постои од самиот почеток на 80-тите години на 20 век и кој е пред сè наменет за дејство против паразитите кај животните, но и кај луѓето.

- Клиничките студии покажуваат дека има ефект во сите фази на болеста. Оние што не се болни го пијат превентивно и не се разболуваат, оние кои имале контакт исто така, болните со лесна клиничка слика, па дури е користен и кај пациенти кои болнички се третираат. Значи во сите фази и студиите покажуваат дека има одличен ефект. Освен тоа станува збор за навистина многу ефтин лек, рече Пановски за Фактор.

Пред да биде одобрен интервентниот увоз на Ивермектинот во Македонија, сосема слично како и за антивирусниот лек Фавипиравир, граѓаните на социјалните мрежи бараа начини како да го набават за себе или за свои блиски заразени со Ковид-19.