ПАДНА ОСТАВКА: Груевски преку фејсбук најави повлекување од пратеничката функција
Објавено во: Македонија 01 Јуни, 2019
Поранешниот премиер на Македонија, а сегашен азилант Никола Груевски преку својот фејсбук профил најави дека се повлекува од функцијата пратеник во Собранието на РСМ.
Како што пишува екс премиерот за тоа во наредните денови ќе биде известен формално правно и законодавниот дом.
„ Целта легално да ми го одземат мандатот е јасно дека е неостварлива. И
според уставот на Македонија и според меѓународните прописи, но и според
неподлегнувањето на притисокот на пратениците на ВМРО-ДПМНЕ кои на комисијата
за мандатно имунитетни прашања не подлегнаа на притисоците и пропагандата и им
одржаа лекција по меѓународно право и уставно право на нивните колеги од власта
кои во отсуство на аргументи расправата ја сведоа на ,,маалска дискусија за
политика на клупа пред зграда,, во текот на расправата на комисијата.
Сепак, иако правото, уставот и меѓународните документи се на моја страна, јас
нема да дозволам нашата партија и пратеници заради мене и мојот мандат да бидат
изложени на било какви притисоци, на лажна пропаганда, на непријатности и на
медиумски линч од страна на власта и нејзините апологети. Несакам понатаму ниту
да дадам можност на СДСМ користејќи ја оваа тема да ги избегнува дебатите за
суштинските теми и проблеми кои го засегаат народот и да ги задскрива своите
криминални политики“, напиша Никола Груевски на фејсбук.
Груевски им се заблагодари на пратениците на ВМРО-ДПМНЕ што издржале на принципиелните позиции кои се во склад со уставот и меѓународното право и не потклекнале на притисоците.