ПАНИКА ВО БРИСЕЛ: Терористите се уште „оперираат” низ градот?

Добивај вести на Viber

Белгиските власти стравуваат дека терористите, кои стојат зад денешните напади во Брисел се уште се во акција. Ова следи откако на аеродромот „Завентем“ беа пронајдени Калашников и повеќе неексплодирани рачно изработени бомби.

Белгиското федерално обвинителство соопшти дека лицата што стојат зад нападите во Брисел веројатно сè уште се во бегство.  Двајца осомничени беа уапсени на аеродромот, но трето лице успеало да побегне.

Инаку, во денешните напади во Брисел загинаа 34 лица, а над 200 беа повредени. За масакрот одговорност презеде Исламската држава.

Терористичката акција се состоеше oд истовремени, координирани напади врз клучни инфраструктурни локации во срцето на административната престолнина на Европската Унија.

Утрово, две последователни експлозијата се случија на основниот аеродром „Завентем“ во Брисел. Според податоците на белгиското федерално обвинителство, еден бомбаш самоубиец активирал експлозив на аеродромот во одделот за патници во делот за полетувања, додека втората експлозија на аеродромот е најверојатно од автомобил бомба.

Eден час подоцна имаше експлозија на метро станицата во Мелбек, која се наоѓа во близина на зградите на европските институции .

Метро-станиците во Брисел ќе бидат отворени во 16 часот по локално време, соопшти белгиското министерство за транспорт и додаде дека околу 500 војници се распоредени по станиците за да ја гарантираат безбедноста на јавниот транспорт.

Белгиските власти прогласија највисоко четврто ниво на сигурност во целата земја по експлозиите на аеродромот и на метро-станиците. Знамињата во Брисел се спуштени на половина копје, во знак на жалост за жртвите.

Инаку, минатата недела во Брисел беше уапсен и еден од главните осомничени за терористичките напади во Париз, Салах Абдеслам.