Пендаровски: Големи шанси за нови 30 дена вонредна состојба, одлука в четврток
Објавено во: Македонија 14 Април, 2020
На состанок на Советот за безбедност в четврток треба да биде донесена одлука за продолжување на вонредната состојба во Македонија. На истиот ден изминуваат првите 30 денови од прогласувањето на вонредната состојба, а претседателот на земјата Стево Пендаровски верува дека истата ќе биде продолжена за уште 30 поради состојбите на терен.
- Шансите се извесни и големи да се прогласат нови 30 дена вонредна состојба бидејќи внатрешните состојби кои не ескалираат но не се значително редуцирани се уште побаруваат ваков тип ангажман од сите надлежни институции и ваков тип на состојба. Првпат вонредна состојба прогласивме во 30 години независна држава меѓутоа првпат и во светот се случуваат некои работи поврзани со пандемија на вирусот, вели Пендаровски.
Шефот на државата сепак вели дека конечната одлука не зависи од неговата волја, туку од мисклењето на сите релевантни институции.
- Така, ако денес ги имам тие информации што се од надлежните институции, ако денес ме прашувате за одлука таа ќе биде во насока да се прогласат нови 30 денови, смета Пендаровски, кој денеска беше во посета на касарната во Тетово.