Поглаварот г.г. Стефан: Ќе ги браниме децата од неприфатливи и нагрдувачки нови идеологии

Добивај вести на Viber

На протестот кој попладнево се одржува пред Соборниот храм во Скопје, поглаварот на МПЦ, г.г. Стефан изјави дека ќе ги бранат децата од неприфатливи и нагрдувачки нови идеологии. 

Вели дека се собрани за достоинствено да го покажат своето прегрнување на сиот свет, како божјо творение. 

„Црквата не протестира против некоја личност и не отфрла никого. Па самиот нејзин живот е непрестаен бунт, но не бунт против човек, туку против злото, против гревот и против смртта во кои за жал пред нашите очи запаѓа светот. Единствена цел на црквата е да го љуби и преобразува овој свет“, рече поглаварот. 

Вели дека секуларно општество не значи и безбожно општество. Тој изјави дека црквата досега преживеала различни идеологии и лажни вистини. 

„Вистината нема потреба да граби за морална супериорност, притоа искористувајќи ги жените и децата“, рече поглаварот. 

Г.г. Стефан изјави дека жената е столб на семејството. 

„Да не дозволиме мајчинството да биде осквернавено со новоисковани поими“, рече поглаварот на МПЦ. 

Законот за родова еднаквост и за матична евиденција се причината поради која МПЦ организира протест. Присутни беа и голем број граѓани. 

фото принскрин