ПОЛИЦАЈЦИ И ИНСПЕКТОРИ НАПРАВИЛЕ „РШУМ“ НИЗ ЛОКАЛИТЕ - угостителите упорно им точат алкохол на малолетници
Објавено во: Македонија 25 Септември, 2022
Синоќа и ноќта, во временскиот период од 00.00 до 04.00 часот, полициски службеници од сите Сектори за внатрешни работи, во соработка со инспектори од државните инспекторати и од Управата за јавни приходи на територијата на целата држава, спровеле акциска контрола за присуство на малолетници во угостителски објекти, контрола за точење и продавање алкохол на малолетници, откривање и злоупотреба на престој од страна на странски државјани и други прекршоци во која биле контролирани вкупно 279 угостителски објекти.
„При контролите се констатирани шест прекршоци за присуство на малолетници во угостителски објекти по дозволеното време, две кривични дела „точење алкохолни пијалаци на малолетници“ казниви по чл. 204 од Кривичниот законик, девет прекршоци од Законот за регистрирање на готовински плаќања и три прекршоци од Законот за лична карта. По целосно документирање на случаите ќе бидат поднесени соодветни поднесоци“, се вели во соопштението од МВР.