Полицијата жестоко ги растера демонстрантите на кои Ердоган им вети средба!
Објавено во: Балкан 11 Јуни, 2013
Неколку стотици специјалци доведени со дваесет автобуси, утрово влегоа во плоштадот Таксим во Истанбул, и со употреба на водени топови и солзавец ги растераат демонстрантите. Слична акција беше спроведена синоќа во Анкара, каде што полицијата употреби солзавец и испука гумени куршуми принудувајќи ги демонстрантите да се повлечат.
Неколку активисти одговорија со огномет и камења на полицијата која возврати со водени топови.
Градоначалникот на Истанбул, Хусеин Авни Мутлу, меѓутоа, изјави дека целта на операцијата е да се симнат плакатите од културниот центар Ататурк и од споменикот на Ататурк на плоштадот. Отстраните се и транспаренти кои висеа од една зграда со поглед на централниот истанбулски плоштад, на нивно место е поставено турското знаме и знамето со ликот на Мустафа Кемал Ататурк. Во текот на ноќта, турската полиција употреби солзавец во Анкара за да ги растера стотиците демонстранти, кои демонстрираат веќе 12 дена против владата на премиерот Реџеп Тајип Ердоган. Последниот потег од страна на турската полиција дојде откако премиерот Ердоган се согласи дека ќе се сретне со организаторите на протестите кои почнаа на 31 мај.
Во понеделникот турскиот вицепремиер Булен Аринч изјави дека премиерот закажал состанок со некои групи коишто ги организираат овие протести и дека ќе се сретне со нив во среда, а со другите некој следен пат, непрецизирајќи со кого Ердоган ќе се сретне. Во анти-владините демонстрации во Истанбул, Анкара како и други турски градови загинаа три лица, а беа повредени околу 5.000.
Она што започна како владин протест против уривањето на паркот Гези во близина на историскиот истанбулски плоштад Таксим поради реконструкција на плоштадот на кој требаше да биде урнат културниот центар во спомен на основачот на современа Турција Мустафа Кемал Ататурк и да биде изграден деловно-станбен комплекс, наводно опера и џамија, се претворија во досега незапаметено искажување на спротиставување на актуелната власт во Турција.
Демонстрантите кои излегоа и на улиците на другите поголеми турски градови сметаат дека авторитарната власт на Ердоган и неговата владејачка „Партија на правдата и развојот “спроведува исламизација на земјата и ги гуши човековите слободи.