Политичка проституција

Добивај вести на Viber

Љубовта некои ја продаваат за пари, други на сопственото тело , нежно и стројно, му ја одредуваат цената, за час, за ден, за недела, и дозволуваат сечии раце да го милуваат, усните нечии чинат 1000, 2000 или со повеќе нули, страста и избликот на еротика за некои се само парчиња хартија на кои се испишани бројки, сексуалното уживање за некои е само миг или дел од секундата, чин кој го практицираат катадневно но не со првичен мотив сладострастие и убост, ниту пак задоволство, туку момент кој со самото завршување ќе им донесе материјална бенефит. Сите овие сентенци, мигови на продавање и купување на љубов, еротика, секс, уживање и милување, кога се проследени со паричен надомест или материјална корист, кога првичниот импулс за нивно дејание е валутата или некоја друга добивка, парфем, патување или кое и да било поклонче, во патологијата се нарекува проституција. Пластично и просто кажано, без околисување, но со претходно фино поимање и појаснување, секој чин на сексуална игра и љубов во кои посредува парична добивка се подведува под поимот проституција. Но нејсе, да не навлегуваме во детално поимање на проституцијата, она што е мој лајт мотив за оваа појава е посебниот нејзин облик а тоа е политичката проституција. Политичката проституција би се сфатила како продавање на идеолошкиот дискурс за материјална добивка и тоа на различни политички сегменти Политичката проституција е посебно актуелна во транзициониот период, а на неа не одолеа ни нашата ни мила државичка. Можеби е малку зачудувачко, посебно во земја со 2 милиони граѓани, да вирее, опстојува и се развива еден посебен облик на општествена девијација каква што е политичката проституција. Ајде сега да се обидеме најпрво да ја дефинираме, нели како што доликува кога се коментира одреден социолошки феномен, а потоа и да видиме колкава е нејзината зачестеност и какви импликации може таа да донесе. Во буквална смисла политичката проституција би се сфатила како продавање на идеолошкиот дискурс за материјална добивка и тоа на различни политички сегменти. Секако дека може и сексуалниот дискурс тука да се пронајде бидејќи не ретко сме имале со згаснување на одреден политички субјект или отстранување на политичар од политичката арена, самоволно или присилно, да своите сексуално-конкубински вештини политичките анимир дами ги искористат за сопствено ново политичко место под сонцето. Е во такви случаи велиме дека тие се политички сексуални вештерки, но не оние што летаат на метла, туку своите вештини умешно ги вткјуваат во своето политичко портфолио, виејќи со телото и со сладострастие на некој нов политичар-актуелен во одреден миг. И на нив сме навикнати и ги препознаваме, некогаш со нив се подбиваме, а некогаш и им заблазнуваме, така тајно, за нивната вештина во впикувањето во политичката игра, на ним својствен начин. Ах бре политички проститутки, до кога ќе ни ја кроите државичката Но деновиве посебно е актуелен еден посебен под вид на политичка проституција, а која сама си ја крстив национал-шовинистичко-барокна. Можеби сулудо ви звучи, но чуму е науката и научната елита ако од нејзиниот ум не се изнедри нов научен поим. Гледаме, слушаме, се фрапираме, мозгаме, мислиме, се чудиме и дочудуваме, критикуваме, но најмалку можеме да сфатиме-што е тоа во луѓето што ги тера на политичка неконзистентност, што е тоа што ги поттикнува и сопствените цврсти политички тези да ги проголтаат и да нудат одредени, би рекла сулуди решенија, кој е тој порив кој ги тера да говорат и да се расфрлаат со зборови во кои и самите не веруваат и што е посилно од човековото достоинство, кое самите се спремни да го згазат. Едно и единетвено можно решение, а тоа е материјална добивка или како што кумановци викаат – пара врти где бургија неќе.... Е зошто сега политичка проституција е затоа што идеолошката матрица е закопана длабоко и веќе не е вредна, зошто критиките и навредите кон политичкиот неистомисленик се веќе минато и заборавено време, продавањето на сопствената идеологија и ставањето на себе си во функција на некој друг, кој има право да те искористи на секаков можен начин е еклатантен пример за политичка проституција. Имаме став и идеологија која се нуди, се дава цена и оп-продадено, како на аукција, а претходното..пупу не важи...Ах бре политички проститутки, до кога ќе ни ја кроите државичката, до кога ќе го узбуркувате и така заматеното тло на нашата ни мирна државичка, до кога? Јас само едно ќе порачам на секоја проститутка и мине цената, а кога ќе се запусти, се знае каде завршува...и да живеевме во виртуелен свет убаво ќе беше да има едно копче кое се вика ДЕЛЕТЕ или делит.... П.С. Молкот на признати и познати политички мудреци не можам да го сврстам во политичка проституција, но можам во политичка изолација која не е ништо подобра од првата....за државата се работи нели... Д - р Татјана Стојаноска Иванова Институт за социологија Филозофски факултет - Скопје