Поради неухранетост секое четврто дете во светот заостанува во растот

Добивај вести на Viber

Постои реален напредок во борбата против заостанувањето во растот кај децата како последица на неухранетост, скриеното лице на сиромаштијата за 165 милиони деца на возраст под пет години, покажува најновиот извештај на УНИЦЕФ, објавен денеска. Извештајот нагласува дека забрзаниот напредок е неопходен и можен.

Едно на четири деца под петгодишна возраст во светски рамки е со забавен раст, поради хронична неухранетост во критичните години од животот. Околу 80 отсто од децата со забавен раст живеат во 14 држави во светот.

Клучот на успехот во борбата против заостанување во растот е фокусирањето на вниманието на бременоста и на првите две години од животот на детето.

Заостанувањето во растот не значи само дека детето има понизок раст за неговата возраст, туку може да значи и забавување во развојот на мозокот и когнитивните способности на детето.

- Заостанувањето во растот поради неухранетост може да ги уништи шансите на едно дете за  живот, како и да ја уништи можноста за развој на еден цел народ, изјави извршниот директор на УНИЦЕФ Антони Лејк.

- Сега е време да се дејствува за да се забрза постигнатиот напредок во решавањето на тој проблем, нагласи Лејк.

Извештајот на УНИЦЕФ ги потенцира успесите во борбата за подобрување на политиките и програмите за храна и промена на однесувањето на 11 држави: Етиопија, Хаити, Индија Непал, Перу, Руанда, Демократска Република Конго, Шри Ланка, Киргистан, Танзанија и Виетнам.