Пожарот во Велес во кој изгореа три деца можно е да е подметнат?

Добивај вести на Viber

Екипите на СВР Велес и основниот јавен обвинител при ОЈО Велес вчера завршија со увидот на терен, што траеше два дена по трагедијата во која во трошна куќа во долот под ридот Вршник во самата шума на 20 јуни попладнето околу 16 часот живи изгореа три дечиња на четри,две и една година.

Од СВР Велес велат дека има претпоставки дека пожарот е подметнат, но за да се поднесе кривична пријава тоа треба да го потврди понатамошната истрага која продолжува.

„Увидот на терен заврши и ние се повлековме од местото на настанот. Тоа е техничкиот дел, но продолжуваме со оперативниот, односно ќе работиме на оперативни сознанија – ќе се продолжи со разговори со граѓани, комшии и останати кои имаат некакви сознанија во врска со случајот. Тоа значи дека истрагата во врска со трагичниот настан продолжува“- вели Верољуб Додевски портпарол на СВР Велес.

Како што информира за МИА, Гордана Тодорова в.д.јавен обвинител од ОЈО Велес увидот на терен од страна на нејзината колешка бил завршен вчера околу 13:30 часот.

„Увидот е завршен, но во тек се вештачењата, анализите и испитувањата во врска со настанот“- вели Тодорова.

Со одлука на Советот на општина Велес на синоќешната вонредна седница денешниот ден 22 јуни е прогласен за Ден на жалост. Попладнево во 13 часот на градските гробишта во Раштани ќе бидат погребани Теона, Петар и Драгана.