ПРЕОДНА ВЛАДА: Пендаровски му го врачи мандатот на Талат Џафери

Добивај вести на Viber

Шефот на државата, Стево Пендаровски денеска му го врачи мандатот на Талат Џафери за состав на преодната Влада која ќе функционира до изборот на новата влада која ќе се формира по парламентарните избори во мај.

Пендаровски, врз основа на член 84 од Уставот, а во согласност со член 43 од Законот за Владата, денеска му го врачи мандатот на Талат Џафери.

„Врз основа на член 84, алинеа прва од Уставот на Република Северна Македонија, а во согласност со член 43 од Законот за Владата на Република Северна Македонија и предлогот на најголемата политичка партија што го формира владиното мнозинство, за мандатор за состав на преодната Влада за спроведување на избори на пратеници, го определувам господинот Талат Џафери“,  изјави претседателот Пендаровски.

Џафери вети дека врз основа на законите и Уставот, преговорите за состав на преодната Влада ќе се одвиваат соодветно на политичката потреба и состојба во државата.

„Со задоволство и потполна одговорност го примам мандатот од претседателот на државата, со ветување дека совесно и врз основа на законите и Уставот, составот на Владата и преговорите за составот на Владата ќе се одвиваат соодветно на политичката потреба и состојба во државата“, рече Џафери.

Тој се надева дека ќе креира соодветен состав на Владата со соодветни обврски, надлежности и одговорности кон граѓаните.

Досегашниот координатор на пратеничката група на СДСМ, Јован Митрески е нов претседател на македонското Собрание. За неговиот избор за собраниски спикер денеска гласаа 65 пратеници, а 40 беа против. Тој вети дека ќе биде отворен за соработка со сите пратенички групи.