ПРЕСУДА: Затвор за Зоран Талер, поранешниот известувач за Македонија!

Добивај вести на Viber

Две и пол години затвор заради корупција ќе треба да одлежи поранешниот министер за надворешни работи на Словенија, Зоран Талер, кој своевремено беше и известувач за Македонија во Европскиот парламент. Талер ќе треба да плати и парична казна од 15 илјади евра заради скандалот кој откри негова вмешаност во корупција во времето кога ја извршуваше функцијата пратеник во Европскиот парламент. Зоран Талер беше еден од неколкуте европарламентарци кои паднаа во замката на англискиот весник „Сандеј тајмс“. Новинари од овој весник тајно ги снимаа избраниците во Европскиот парламент како примаат мито од 100 илјади евра за да влијаат за усвојување на одредена легислатива во Европскиот парламент. За овој скандал, екс-шефот на словенечката дипломатија го гонеше полицијата во Љубљана, а тој се договорил со обвинителството. „Формално со тој договор ја признавам вината. Пред две години, и покрај тоа што се противев, бев втурнат во шоуто на „Сандеј тајмс" во сопственост на Мердок, а со овој договор доброволно ќе излезам од тоа шоу", изјавил Талер, кој паричната казна ќе ја плати во корист на Педијатриската клиника во Љубљана. Освен затворот и глобата, Талер пет години нема да има право да се вработи во јавна служба. Зоран Талер сега е невработен. Покрај него, во замката на „Сандеј тајмс" паднаа уште тројца други пратеници од Европскиот парламент. На австрискиот пратеник судот во Австрија неодамна му ја поништи четиригодишната затворска казна, против романскиот пратеник е покренато обвинение, а против шпанскиот европарламентарец воопшто не е покрената никаква судска постапка и тој се уште е во парламентот. Сопственикот на весникот „Сандеј тајмс“ Руперт Мардок подоцна и самиот се соочи со обвиненија затоа што новинари во неколку негови изданија прислушувале и хакирале телефони на познати личности и така црпеле информации. Ова е видеото со кое новинарите на „Сандеј тајмс“ докажуваа дека Талер примил мито и заради кое тој беше принуден да поднесе оставка од позицијата во Европскиот парламент: http://www.youtube.com/watch?v=4YlFd8wdI5Y