Претседателот на Македонија го осуди односот кон фудбалерот Алиоски
Објавено во: Македонија 14 Јуни, 2019
Претседателот на Македонија, Стево Пендаровски, го осуди односот на вработените во кафуле во Прилеп кои практично го избркале македонскиот фудбалски репрезентативец Езџан Алиоски и неговото семејство само поради тоа што зборувал на албански јазик.
„Она што му се случи на нашиот Езџан Алиоски е недопустливо и за осуда. Разликите треба да не обединуваат, а не да разделуваат. Tака е во успесите, но и во неуспесите на секое поле. Јас сум убеден дека огромно мнозинство од нашите граѓани прават разлика само врз основа на тоа што е добро, а што лошо, а не врз основа на тоа кој јазик го зборуваме, како се молиме или како изгледаме. Јас сум уверен дека огромно мнозинство од нашите граѓани веруваат и се застапуваат за тоа дека секој треба да има еднакви можности во Република Северна Македонија, богатството на земјата е во мултикултурното општество кое го градиме сите.
Езџан Алиоски за македонската репрезентација до сега одиграл 28 натпревари во различни натпреварувања, зборувајќи го јазикот што најдобро го знае на терен со постигнати 5 голови и 6 асистенции, а ја претставува земјата во Шампионатот на Англија. Езџан продолжи да не' радуваш со добрата и тимска игра, пример од кој учи целата држава“, се вели во реакцијата на Пендаровски.
Од МВР синоќа соопштија дека одговорните од прилепското кафуле биле повикани на информативен разговор по реакцијата на фудбалерот на Лидс јунајтед.