Добивај вести на Viber
И официјално започна пријавувањето за искористување на владината мерка за еднократен отпис на долговите за граѓаните од социјално ранливите категории.
Од утрово граѓаните - потенцијални корисници на мерката, на шалтерите на Центрите за социјална работа се информираат за потребните документи и постапката по која ќе можат да аплицираат.
Уште на првиот ден само до пладне биле подигнати вкупно 2.000 формулари неопходни за да се поднесе барањето. Надлежните очекуваат мерката да ја искористат меѓу 50.000 и 100.000 граѓани.
„Задоволни сме што во центрите за социјална работа граѓаните доаѓаат и се интересираат, а некои од нив веднаш поднесуваат барање“, изјави вицепремиерот и министер за финансии Зоран Ставрески. Тој заедно со министерот за труд и социјална политика Диме Спасов го посети Центарот за социјални работи во Гази Баба.
„Заедно со сите институции што се вклучени за еднократен отпис на долговите имавме соодветни обуки за вработените за да ги подготвиме и да им укажеме на документацијата и начинот на реализација на проектот“, истакна Спасов.
Барањата треба да се поднесат во рок од 30 дена од објавувањето на повикот. Потоа, посебна комисија формирана од министерот за труд ќе ги проценува барањата и ќе одлучува кој се има право на отпис на долговите за неплатени сметки, рати од кредити, камати, нотарски и извршителски трошоци.