Принцот Чарлс е во Атина, вели Грција му е во крвта

Добивај вести на Viber

Грција ми е во крвта и со години бев фасциниран од културата и историјата, изјави принцот Чарлс во изјава за грчкиот весник „Катимерини“, само еден ден пред неговата официјална посета на Грција.

Како што јави дописничката на МИА од Атина, тој ја спомена финансиската криза од изминатите години наведувајќи дека сака да помогне на Грција, особено на младите.

„Знаејќи дека Грција и многу Грци поминуваат тешко во последните години, сакав да најдам начин, па дури и мал и ограничен, за да им помогнам на младите во земјата целосно да го развијат нивниот потенцијал или преку обука или подржувајќи ги да започнат сопствени бизниси. Со оваа тема веќе 42 години се занимава мојата добротворна организација „Принсис траст“ (Prince’s Trust) во Велика Британија, а од неодамна и во странство, посочи принцот од Велс, додавајќи дека можеби искуството „би можело на некој начин да биде корисно за решавање и надминување на предизвиците што пред себе ги има оваа толку посебна земја“- вели тој. 

Тој е во тридневната посета на земјата, на покана на грчкиот претседател Прокопис Павлопулос, што има за цел да ги уважи силните и вековни врски меѓу Грција и Британија.

Кралскиот брачен пар има богата програма, првите два дена ќе биде во Атина, а последниот ден ќе замине за грчкиот остров Крит.