Проект „Купи куќа, купи стан“ – доделено 500-то решение
Објавено во: Економија 09 Април, 2015
Денеска беше доделено 500-тото решение од проектот „Купи куќа, купи стан“ со кој Владата на еден вид преку субвенционирање им помага на граѓаните да дојдат до сопствен дом.
Среќното семејство овој пат беа Димовски, кои 15 години живееле под кирија, а решението им го додели вицепремиерот Ставрески.
- Велигденските празници се период кој вообичаено го поминуваме со семејството и во домот и уште повеќе се потврдува тоа дека вистинското богатство на секој човек е семејството, домот и хармонијата. Затоа ми е мило што во оваа велигденска недела имав можност да бидам во домот на семејството Димовски кое симболично е 500-тиот корисник на проектот „Купи куќа, купи стан“, изјави вицепремиерот Ставрески.
Ставрески посочи дека овој проект досега предизвикал голем интерес кај граѓаните и оти од тие причини е отворена канцеларија во Министерството за финансии каде може да се добијат информации за можностите што ги нуди, без разлика дали се работи за учество за кредит или за половина рата.
- Се работи за значителна финансиска поддршка од државата. Во последниве месеци имаме над 25 одобрени барања. Вкупниот број е 524, што значи дека проектот наиде на добар интерес кај граѓаните, рече Ставрески.
Новите сопственици на стан изразија задоволство од можноста што им ја дала државата да можат со 50 проценти субвенционирано учество да дојдат до сопствен дом.