Добивај вести на Viber
Професорот Дејан Трајковски има оптимистички прогнози.
„Со ширењето на сојот Омикрон во Јужноафриканската Република (ЈАР) стапката на леталитет (Case Fatality Rate - CFR) е во слободен пад (на дијаграмот на сликата). Ќе ја следиме ситуацијата во наредните денови, но ова изгледа многу добро. Толку низок леталитет во ЈАР немало од почетокот на епидемијата, иако не знаеме какво им било темпото на тестирање тогаш и сега.
Стапката на леталитет се пресметува како количник на седумдневната подвижна средина на бројот на починати и седумдневната подвижна средина на бројот на дијагностицирани, но времески поместена 10 дена порано. Дали помага досегашниот имунитет од прележување и вакцинирање или едноставно Омикрон сојот не е толку смртоносен, ќе се утврдува дополнително, но ова е добар знак. При тоа, треба уште да се има предвид дека во ЈАР настапува летото, што исто така претставува позитивен фактор.
Кај нас, инаку, изгледа како да се остварува првобитното сценарио од летоска, од пристигнувањето на Делта сојот, според кое се очекуваа два врва - едниот летен (од пристигнувањето на позаразниот Делта сој) и еден есенски (заради зголемената преносливост), коијшто требаше да достигне максимум во текот на ноември. Изгледа како да се остварува токму тоа предвидување.
Иако со Делта сојот епидемијата постепено се смирува, треба да го издржиме и бранот на Омикрон сојот, но според ова што го гледаме во ЈАР, иако ни претстои голем број на нови случаи, леталитетот и морталитетот би требало да бидат значително помали. Но, да почекаме уште петнаесетина дена за посигурни заклучоци. Сепак, зимата е пред нас, а таа сепак ги прави сите работи полоши“, пишува професорот Трајковски.