ПРОГРЕСИВЕН ДАНОК: За бизнисот непотребна мерка, за власта социјална правда

Добивај вести на Viber

Со почетокот на оваа година стапува во сила прогресивното оданочување. Со законските измени се предвидува даночна стапка од 10 отсто, а се воведува и стапка од 18 отсто, која ќе се однесува на даночна основа што надминува еден милион и осумдесет илјади денари на годишно ниво, односно 90 илјади денари на месечно ниво. За даночната основа до 1.080.000 денари на годишно ниво, како и до 90 илјади месечно, останува примената на постојната даночна стапка од 10 отсто.

Исто така, доходот од закуп, подзакуп, дивиденди, капитални добивки, игри на среќи и друг доход ќе се даночи со 15 отсто.

За поголем дел од експертската јавност, бизнис секторот и стопанските комори воведувањето на прогресивниот данок ќе ги предизвика негативни ефекти на и онака слабата македонска економија и тие беа против ваквата реформа.

Меѓу првите што реагираше беше Стопанската Комора за информатички и комуникациски технологии МАСИТ, која ги претставува ставовите и мислењата на повеќе од 80 од најголемите и најиновативни компании во земјава. Според МАСИТ, ваквата реформа не би придонела за подобрување на социјалната еднаквост туку напротив ќе доведе до целосно намалување на продуктивноста и вработливоста и секако развојот на квалификациите.

- Со оваа даночна реформа ќе се предизвика пенализација на деловите од населението кои напорно работат кон напредување и повисоки приходи, а ќе се наградуваат оние кои не се трудат и со тоа директно се создава намалување на продуктивноста- велат во МАСИТ.

Дополнително, според нив со ваквата даночна реформа се врши дестимулирање на развојот на висококвалификуваните кадри односно зголемувањето на данокот на личен доход најмногу ќе ги погоди оние кои вложувале во сопствениот професионален развој и ќе испрати порака дека квалификуваноста е неисплатлива, со што ќе се отстрани стимулот за развој на способности и квалификации. Тие укажуват дека даночната реформа ќе предизвика ефект на даночна непослушност и зголемување на даночната евазија. Исто така го спомнуваат и одливот на мозоци и намалени капитални инвестиции што дополнително ќе влијае негативно врз македонската економија.

Мерките што ги донесе Владата за воведување прогресивен даноквоопшто нема да го дадат саканиот ефект во поглед на подобрувањето на социјалната еднаквост во земјата, напротив ќе ја намали продуктивноста и вработливоста, сметаат од Американската стопанска комора во Македонија.

Во АмЧам, која има 125 членки, сметаат дека предложените мерки додатно ќе ја намалат даночната послушност со што ќе се зголеми сивата економија.

- Ваквите мерки само ќе имаат негативен ефект врз растот на македонската економија и тоа поради одлив на капитал и намалени инвестиции, одлив на мозоци и дестимулација на иновативните „смарт“ индустрии кои генерираат најголеми приходи и се двигатели на економијата- велат во АмЧам.

Многумина од експертите оценуваатдека со прогресивниот данок ќе биде опфатено само 1 отсто од вкупното население, а предвидено е да се соберат околу 25 милиони евра во Буџетот, што, според нив, не е ни приближно голема сума потребна за справувањето со сиромаштијата.