Првата инвестиција што ја најави Мицкоски по пет месеци почнува со работа во Македонија

Добивај вести на Viber

Алказар Енерџи МКД, првта инвестиција што ја најави премиерот Христијан Мицкоски по доаѓањето на власт, започнува со работа во Македонија, но уште не со производство на електрична енергија, туку со административните подготовки.

Инвеститорот од Дубаи ја основа својата фирма во Скопје, која засега е на микро ниво со почетен влог од 5.000 евра, на адреса во деловниот центар Хипериум. Првичната дејност што е регистрирана е „советување во врска со работењето и останатото управување“. За менаџер е назначен Полјакот Пјотр Даниел Волошченко кој ќе биде испратен од базата во Дубаи.

Во јуни на презентација пред јавноста беше најавен ветерен парк што ќе произведува еден терават електрична енергија кој ќе почне да се гради на почетокот на 2026 година како прв голем проект што го најави новата влада предводена од Мицкоски.

Инвестицијата на „Алказар енерџи“ е најавена со вредност од над 500 милиони долари. „Алказар енерџи“, според информациите објавени од самата компанија, има седиште во Луксембург, со советодавен тим во Дубаи. Фондот, на чие чело е соосновачот Даниел Калдерон, се фокусира на проекти поврзани со обновлива енергија на пазари во развој во Европа и во Турција. Ветерниот парк, како што беше посочено на промоцијата на инвестицијата, ќе има 55 ветерници и ќе се гради меѓу три општини Карбинци, Штип и Радовиш. 

Електричната енергија што ќе се произведува од овие ветерници е приближно 20 отсто од целокупното производство на електрична енергија во земјава. Во текот на изградбата на ветерниот парк се очекува да бидат отворени 630 нови работни места.

Од опозицијата реагираа дека сè уште станува збор само за писмо за намери за инвестирање со пари кои инвестицискиот фонд треба да ги собере до крајот на 2025 година, па дека оттука, како што рекоа, има елементи за спин во информацијата на Владата во делот на странските инвестиции. Реагираа дека освен што Алказар Енерџи нема свои, туку собира пари од други инвеститори, и дека на ваков начин има реализирано само 6 енергетски постројки и тоа во Египет и Јордан, од кои две ветерни фарми и 4 фотовотлаични електрани. Според нив, краен сопственик на фондот била кинеска државна компанија.

Проектот е започнат пред повеќе од петнаесет години од страна на бизнисменот Стефан Пулејковски, а во меѓувреме е предаден на шпанскиот „Инвал“ кој во меѓувреме прејде во сопственост на „Алказар Капитал“. Како независен инвестициски фонд „Алказар енерџи“ е основан во 2014 година. Првите количини електрична енергија во Македонија треба да ги произведе во 2027.

А.К.